Genesis 39

Joseph se Potiphar ko nuwus

1Ishmael alo Joseph ilak nama Egypt, Potiphar ilak diaman. Potiphar mu Egypt kari, nu Pharaoh ko kawam ko kager kari nunga supuling bagakaso. 2Se Joseph Potiphar ko kawam te bagakaso. Bare Kari Biya nu ilak, se mel bitakaso mu yawarakala aratukaso. Se Potiphar mel mu arigam 4ale nu Joseph ko amilmilakaso. Se umutang te nu ko mel suen biya ko kawam te, se ura suen biya, mu Joseph bituokko balam. 5Se tom mu te Kari Biya Egypt kari Potiphar, se ko kariimet, ko ura, ko ningam, ko mel suen biya ago marak tuikaso. Mu awuk, Joseph nongorak bagakaso se. 6Potiphar mel suen biya Joseph kuting te beteram ale bituokko balam. Ale nu kota mel bo me bitarukaso. Na naukko mu la ko ikia tokaso.

Joseph kulak yawara sokel ago, ko koma motam ariga yawarakala. 7Buta se kam maiya mena Potiphar ko nuwus Joseph arikaso ale ko gomang barasukaso se ko baga turutuwukaso. Ale maonam, “Ni tai agarak anirko.”

8Bare Joseph meram ale maonam, “Aninga biya noko mel suen biya kawam te wore bituekko aga balam, se nu mel bo ko me ikia moso. 9Ani kawam imi te aga sokel mu noko iwitatala. Nu ani ago ko mel bo me guramoso. Bare noko nuwus nigita. Awuk ani Kaem motam te kilek memek sumu bitirikko ya! Ani uwuta bitirik mu ani Kaem koma te ikup betesam.” 10Joseph uwuta balam, bare imet mu tom suen biya Joseph ilak anirukko yam isaru lagakaso. Bare Joseph noko den me ikikaso, ale ilak me anikaso.

11Bare tom bo Joseph kawam ningi ura bitirukko kasu naguram, bare ura kari sang mu kawam te mena. 12Se Potiphar ko nuwus Joseph ko guang te iluwam ale balam, “Tair agarak anirko,” mam. Bare imet mu Joseph ko guang la kutuwu tam, se Joseph naguram watingi aratam.

Se imet mu mel mu arigam, 14guang ilu se kawelaram, ale ko ura kari sang nunga auram se taiman, se nunga maonam, “Arigalko!” mam. “Aninga agari Hebrew kari owore anananga kawam bituokko balam, se aitakta kilek memek ana ningi bitirukko negeram! Nu kawam ningi utu naguram aninga iluwam ale agarak anirukko negeram, bare ani sail te airem, 15se ikiam ale ko guang ani abeta dugu te beteram mu imitanga, ale naguram watingi aratam!”

16Se imet mu Joseph ko guang am iluwaram se ko kuari tai aratam. 17Se den koma suwanta mu la maonam, “Hebrew ura dungan kari,” mam, “ni diarem ilak anananga kawam te tairem, mu nu aningate tairam ale kilek memek agarak bitirukko kaeram. 18Bare ani airem, se guang beteram ale naguram watingi aratam.”

19Se Joseph ko kari biya Potiphar den mu ikiam ale gomang ninguru magaram. 20Se balam se Joseph talipara kawam ningi beteman, kawam Pharaoh ko talipara kari te anikasan mu ningi beteman se bagakaso.

21Bare Kari Biya Joseph ilak baga se ko sinar tokaso. Se talipara kari nunga bitua kari biya mu Joseph ko ninguru amilmilakaso. 22Ale balam se Joseph talipara kari suen biya nunga bitaru se ura te nunga bitarukaso. Kari Biya Joseph ilak, se mel nu bitakaso mu yawarakala aratukaso. Se talipara kawam ko supuling Joseph mel bitaruwakaso mu ko me ikia moakaso.

23